كتير مننا بيتشد للعالم الاخر طبيعه بشريه المجهول ديما مثير اوقات بنسعي للمعرفه الغامضه بس المعرفه احيانا ممكن تبقي تمنها روحك
انا ساره عندي 20 سنه زيي زي اي بنت عاديه عايشه مع بابا وماما ومليش اخوات انا مش بنت اجتماعيه خالص مليش صحاب ومش بحب اتعامل مع الناس حتي اهلي مش بختلط بيهم كتير ديما ببقي ف اوضتي لوحدي مش عارفه دي فعلا طبيعتي ولا هو اللي خلاني كدا
عارفين هو مين!! هو يبقي السر بتاعي كنت فاكره وجوده في حياتي ميزه بس مكنتش اعرف انه اللعنه اللي هتدمر حياتي او يمكن انا اللي دمرتها بفضولي مش عارفه بس انا هحكيلكم اللي حصل واسبكم انتو تحكموا
كل حاجه بدأت وانا عمري 16 سنه لما بدأت احلم احلام غريبه كنت بشوف جني في احلامي وكان بيقول اني ملك لي كنت فاكره فالاول انها مجرد احلام عشان بقرأ قصص مخيفه كتير بس الاحلام موقفتش وبقيت يوميا بشوفه كان عقلي رافض يصدق ان دي اكتر من احلام وبقي همي الوحيد اتأكد اللي بشوفو في احلامي دا فعلا جن ولا دي تخاريف ووقتها جتلي فكره دخلت الحمام وبدأت اكلم واقول انا معرفش انت جن حقيقي ولا لا بس لو انت حقيقي اكيد هتسمعني وعيزاك تثبتلي وجودك اظهرلي في الحقيقه
فضلت مستنيه لكن محصلش حاجه ضحكت وقولت ان شكلي اتجننت ورجعت اوضتي ولما جه نص الليل بدأت احس اني مش لوحدي في الاوضه حاسه بنفس شخص معايا الجو بقي برد مع اننا في الصيف كان المفروض اخاف لكن حسيت ان الموضوع مثير وبذات لما لقيته واقف قدامي هو نفسه الجني في احلامي لما تشوفو تفتكروا انسان لكن عيونه المخيفه ونظراته الحاده تخليك تحس ان دمك هيتجمد في عروقك منكرش اني خفت وقلبي كان صوت دقاته يسمعها اي حد من بعيد لقتني ببصله ومن قادره احرك عيني عنه وبصعوبه لساني نطق انت مين؟!!
الجني: انا الامير كيران امير المملكه التالته من العالم السفلي انا اقدر اكون سعدك في الدنيا واقدر اكون جحيمك كنت مكتفي اشوفك في الاحلام لكن انتي طلبتي ظهوري ولكل شئ تمن يا انسيه
ساره: وليه ظهرت في احلامي ليه انا؟
كيران: في حاجات لازم تفضل مستخبيه المعرفه مش ديما بتكون كويسه اوقات بتدمر صاحبها
ساره: بس انا عيزه اعرف عيزه اعرف كل حاجه اعرف اللي محدش غيري يقدر يعرفه عايزه اكشف الاسرار
كيران: والتمن؟
ساره: هدفعه
كيران: ليكي اللي طلبتيه هعرفك اسرار العوالم واي حاجه عيزه تعرفيها مجرد ما تفكري فيها هتشوفيها هكشفلك اسرار الانس من قبلك واسرار عالم الجان لكن يوم ما اجي اطلب التمن لو مدفعتيهوش هيكون الجحيم رحمه ليكي ملي هخليكي تشوفيه
ساره: موافقه
دا كان الاتفاق بنا كنت مبهوره بلي حصلي وان عندي اللي مش عند حد تاني مر اربع سنين وكل السنين دي وانا ببص لاي شخص بعرف عنه كل حاجه كشفت اسرار كتير وحكايات كتير وحتي عالم الجان اي حاجه كنت بفكر فيها او اي سؤال يجي علي بالي كنت بشوف اجابته كنت مبهوره بقوتي لدرجه اني نسيت اني لسه مدفعتش تمنها وجه عيد ميلادي العشرين وكانت ليله اكتمال القمر وظهر كيران قصادي كل السنين اللي فاتت وانا اتعودت علي ظهوره ووجوده لكن المره دي لما شفته قلبي اتقبض وخوفت المره دي مكنش بهيئه بشريه دا كان بهيئته في عالمه مجرد ما بصتله حسيت بدمي بيقف في عروقي واكن عيني هتخرج من مكانها نفسي بقي تقيل واكن في جبل محطوط علي قلبي
كيران: جه وقت دفع تمن معرفتك
فضلت بصاله مش قادره انطق انا مش حاسه بحاجه غير الخوف ومستنياه يكلم اكني مسجون ومستني حكم القاضي عليه
كيران: التمن هو روحك هاخدك معايا عالمي وهتبقي اسيرتي للابد وزي ما علمتك ازاي بتنقل بين العالمين المسار اللي هتمشي فيه انتي اللي هتفتحيه هتفتحي بوابه سجنك بايدك
بصعوبه قدرت انطق انا مش هقدر اعمل كده
كيران: لو رفضتي اهلك هيدفعوا التمن هتتحسري عليهم وانتي شايفه عذابهم قدامك مش طايلين الحياه ولا الموت انا حذرتك زمان وانتي اخترتي ودلوقتي اختاري لتفتحي المسار وتيجي معايا لهدوقك انتي واهلك الجحيم علي الارض
دموعي نزلت من الخوف ولاول مره اقول ياريت ياريت مكنت عملت كدا ياريت مكنت استدعيته ياريت كل ده مجرد حلم لكن للاسف كان حقيقه بصيت علي باب اوضتي من ضمن القوه اللي ادهالي اني اقدر اشوف اللي ورا البيبان شفت امي وابويا في قعدتهم البسيطه قدام التلفزيون لاول مره اتمني لو اقدر اروح اقعد معاهم هما ميستهلوش يعانوا بسبب اختياري غمضت عيني بألم انا اللي مشيت طريق مفيهوش رجوع استخدمت القوه اللي ادهالي وفتحت المسار فتحت باب سجني وعذابي بايدي واختفيت من عالم البشر
كنت فكراه انه ميزتي لكن هو طلع لعنتي
............................................
النهايه